“Si cosnan no ta na mi manera, mi kier cambi’e”

Marko ta un hoben cu ta opera riba iniciativa y innovacion. Transicion ta un tema recurente den su bida. Den su man Colarin a transforma di un corant pa un revista di calidad halto. Na augustus 2006 Marko a lanta e website (“su website”) di Colarin cu killershots, videocast y blogsnan tocante di Colegianonan.

“E concepto di revista ta cambiando”

Segun Marko hobennan awendia no ta lesa corant di papel mas. Television tambe ta perdiendo e influencia cu un tempo e tabata tin. Hobennan ta saca nan noticia mas y mas for di internet. Website di noticia online, corant online y You Tube ta birando e fuente di informacion pa un grupo grandi den comunidad. E transicion aki ta interesa Marko y e lo kier specialisa su mes riba fuentenan di informacion digital.

Marko, con abo lo ta na 202?

Cu un sonrisa Marko ta indica cu e lo ta forma parti di un canal di television, mas tanto como director. Marketing Consultancy lo ta su profesion y e lo ta operando sigur un plataforma digital pa ofrece tur tipo di informacion pa medio di video y holograms. Pero tin un chens cu e por ta un accountant tambe!

Ki paso abo por tuma cu lo haci un diferencia na Aruba?

“Mi lo bai den politica!” Politica ta segun Marko un oportunidad pa trece cambio. Ora di a cuminsa Colegio Arubano, e tabata un experiencia decepcionante pa Marko. Un transformacion tabata necesario. Marko a traha duro pa contribui na e cambio aki pa medio di Colarin. Cu feedback di otro Colegianonan e a logra di por lo menos concientisa studiantenan, maestronan y Rector Kolfin riba e oportunidadnan di cambio na Colegio. “Si ami lo tabata e rector…..!”

Un otro punto cu Marko a trece padilanti ta cu no mester purba cambia hende ora nan ta grandi, pero mester start educacion na e momento di planta e simia. Den e ultimo añanan e hobennan den examenklas ta hayando hopi atencion dor di e porcentahe abow di geslaagden. Pero, segun Marko, mester pone atencion na e ensenanza den Brugklas caba. Maestronan y otro adultonan mester tambe ta conciente cu nan ta e ehempel pa e hobennan. “Bo no por bisa un hoben pa ta conciente di medio ambiente, si bo mes no ta paga luz ora di laga klas!”

Ki cambio bo ta mirando awor den nos comunidad?

Marko ta indica cu den e comunidad di Aruba tin un abilidad di transicion y profesionalismo cu por ta un base positivo. Ta importante pa supera sinembargo e polarisacion y desunion actual.

“Experiencia y sabiduria no tin prijs”

Marko ta activamente envolvi den recaudacion di fondo pa e sector social na Aruba. Dor di organiza Teen Talents Unleashed pa Kiwanis Key Club Colegio Arubano fondo ta wordo recauda pa duna na comunidad di Aruba. Tambe parti di e fondo aki ta bai na Key Club su miembronan cu por participa na e International Convention cu lo tuma lugar na Denver pa haya por ehempel training di leadership. Kico Marko mes ta haya for di e trabownan aki? E satisfaccion di a contrbui y e experiencia y sabiduria cu lo ta util pa logra su ambicion.

Con bo ta mira Aruba na 2025? Duna tres deseo.