|
An Un Proceso Inovativo
E momento a yega pa e comunidad di Aruba expresa e rumbo cu Aruba mester tuma. E diferencia entre pasado y presente ta cu e contribucion di e comunidad Arubano lo bira e base di un vision; un plan strategico cu lo realisa e pasonan necesario pa logra e vision di Nos Aruba 2025. Door di produci un vision, por bin cu meta pa implementa e vision aki y pa experencia finalmente e Aruba cu nos comunidad berdaderamente ta desea. E delaster binti añanan e economia di Aruba ta wordo caracterisa pa cu un crecemento economico hopi grandi cu consecuencia cu nos poblacion a crece hopi cu e necesidad, riba un base constante, pa mehora nos educacion y salubridad publico. Tambe tin e necesidad pa proteha nos medio ambiente. Consecuentemente, metanan riba tereno economico, social y di medio ambiente mester wordo coordina na un manera integral pa logra un desaroyo na unda tin un balans entre e sectornan cu sostenibilidad den mente. Un otro diferencia cu experencia di pasado, ta e manera integral cu lo coordina e metanan cu lo bin dilanti. Esaki kiermen cu meta riba tereno economico, social y di medio ambiente lo ta relaciona cu otro pa produci un resultado balansa. E manera integral aki ademas lo haci e realisacion di e vision di nos Aruba un exito, ya cu e actornan di diferente sector lo ta cooperando cu otro durante e proceso di e vision di Nos Aruba 2025. Tanto sector priva como sector publico y comunidad en general lo participa activamente den e proceso. Kico ami por haci? Mi ta stima mi isla. Mi kier lo mihor pa mi pais. Con mi por aporta? Tin diferente manera cu bo por contribui na Nos Aruba 2025.
|
