|
 Aruba ta un pais na unda e casnan semper ta habri pa laga e brisa suave di e biento tropical drenta y pa ricibi amigo y famia cu un caluroso bonbini. Aruba ta un comunidad conoci pa su hospitalidad autentico, un comunidad cu ta sinta hunto den bario pa hunga domino y un comunidad caminda muchanan por hunga pafo liber y feliz.
Imagina bo un isla cu espacionan enorme habri y marca pa un paisahe rustico precioso, beachnan pintoresco y un colección extenso di flora y fauna.
Imaginabo un comunidad cu ta cuida su grandinan y su mes.
Imaginabo un comunidad cu ta balora su diversidad; un diversidad cu ta existi ya caba pa siglo.
Imagina Aruba.... Bo Aruba....
Bonbini na Nos Aruba 2025!
Durante siglonan, Aruba su habitantenan a mustra resistencia, determinacion, creatividad y un abilidad unico pa sigui padilanti. Durante añanan, hende di tur parti di mundo a yega Aruba y a contribui cu nan propio talento y tradicion na e cultura colorido di e isla.
Recientemente Aruba a pasa door di diferente cambio economico y politico. E ceramento di e refinería petrolero, LAGO (1985) a señala e comienso di un era nobo cu a trece sacrificio economico, pero cu tambe a pone e isla den un direccion positivo y nobo. Na 1986, Aruba a obtene su Status Aparte y a haci tambe esfuersonan grandi pa ta exitoso económicamente door di turismo. Un crecemento económico enorme compaña pa un crecemento di e población Arubano. E abilidad pa transforma e desafionan aki pa resultadonan positivo ta demostra e forsa y e caracteristica unico di e Arubiano. Awendia Aruba su industria turistico ta un ehempel pa otro destinacion den Caribe.
E poblacion Arubano ta conta aworaki cu mas di 105.000 habitante. E tasa di crecemento a pone presion riba nos educacion, salubridad publico y medio ambiente den un periodo relativamente cortico. Nos comunidad a bira consciente di e desbalansa aki y ta exigiendo awor mehoracion den nos sistema di educacion, salubridad publico y proteccion ambiental pa reestablece harmonia. Pa yega na un balansa social, económico y ambiental na Aruba, nos mester traha pa yega na un desaroyo sostenibel pa e isla. Pesey e obhetivo principal di Nos Aruba 2025 ta pa desaroya un Aruba sostenibel na beneficio di tur stakeholder na Aruba y cu tin un futuro pa nos yuinan y pa nos nietonan cu lo laganan ta orguyoso di ta Arubiano. Pa logra desaroyo sostenibel un grupo grandi di stakeholder ta involvi den e proceso di Nos Aruba 2025. Actualmente, diferente stakeholders tin nan mesun vision riba desaroyo sostenibel, con e mester wordo planifica y con e vision aki ta evidente den e diferente plannan strategico. Ademas awor aki no tin un proceso consistente y coherente, incluyendo guianan pa planificacion y cooperacion pa termino largo. Esaki ta conduci na iniciativanan di e stakeholders en cuestion cu no ta coordina
Basa riba esaki ta importante cu ta determina normanan den cuadro di planificación economico, ambiental y social pa desaroyo sostenibel na Aruba y mester tin coordinacion y coherencia entre tur stakeholder involvi den planificacion. Tambe mester institutionalisa e proceso di planificacion integral. Ademas un strategia nacional pa termino largo cu ta enfoca riba un método interdisciplinario y multi-sectoral cu ta conduci na un Plan Nacional Integral Strategico (NISP) ta esencial. E plan aki lo mester describi strategianan pa termino largo mara na obhetivonan nacional y con lo implementa e strategianan aki. Termino largo kiermen den e caso aki un periodo di diescinco aña. Mirando cu esaki lo ta un plan nacional, ta consehabel cu stakeholders cu tin hopi influencia riba realisacion di desaroyo sostenibel participa activamente na e proceso multi-dimensional aki. Tur esaki lo conduci na un plan nacional integral strategico. E stakeholders cu influencia ta Gobierno di Aruba, NGO’s, Parlamento y sector priva. E desaroyo di apoyo amplio den comunidad ta engrandece e experticio den e area aki y ta hisa e posibilidad di un implementacion exitoso di e plan. Ta e intencion cu tur stakeholder ta bin bek hunto cada tres aña pa evalua y actualisa e plan. Na final di e proceso e Millennium Development Goals (MDGs) pa Aruba lo mester wordo defini.
|
